Вӑрнар муниципаллӑ округӗн администрацийӗн пуҫлӑхӗ Андрей Тихонов хӑйӗн ирекӗпе ӗҫрен кайнӑ. Ӗнер округри депутатсен пухӑвӗн ларӑвӗ иртнӗ, унта отставка ыйтӑвне пӑхса тухнӑ.
Андрей Тихонов Вӑрнар тӑрӑхне 2020 ҫулхи юпа уйӑхӗнченпе ертсе пынӑ. Хальхи вӑхӑтра округ администрацийӗн пуҫлӑхӗн тивӗҫӗсене вӑхӑтлӑха унӑн ҫумӗ, территорисене хӑтлӑх кӗртес тата аталантарас енӗпе ӗҫлекен управлени ертӳҫи Сергей Петров пурнӑҫлать.
Чӑваш Енӗн Ӗҫ тата социаллӑ хӳтлӗх министерствине пӑхӑнса тӑракан икӗ учрежденире ҫӗнӗ пуҫлӑхсем ӗҫе кӳлӗннӗ. Вӗсемпе коллектива Алена Елизарова министр иртнӗ эрне вӗҫӗнче паллаштарнӑ.
Йӗпреҫри халӑхӑн социаллӑ ыйтӑвӗсене тивӗҫтерекен центрта директор тилхепине Андрей Иванова тыттарнӑ. Ҫав ҫын унччен Раҫҫейӗн Пенси фончӗн Вӑрнар районӗнчи управленине ертсе пынӑ.
Комсомольскинчи ҫавӑн пек центра Ирина Долгова ертсе пыма тытӑннӑ. Вӑл маларах районти халӑха социаллӑ пулӑшу паракан центрӑн пуҫлӑхӗнче тӑрӑшнӑ.
Чӑваш патшалӑх юрӑпа ташӑ ансамблӗнче балетмейстера ҫирӗплетнӗ. Ку яваплӑха Алексей Тимошенко пурнӑҫлӗ.
Алексей Викторович малтан Кострома облаҫӗнчи культура колледжӗнче вӗреннӗ, кайран — Мукскаври культура институтӗнче. Вӑл — Пӗтӗм Раҫҫейри тата тӗнчери конкурссен лауреачӗ.
Тӗрлӗ ҫулта Алексей Тимошенко «Волга-Волга», «Белые Ночи» ансамбльсен балет артистӗнче, Хӗвеланӑҫ ҫар округӗн юрӑпа ташӑ ансамблӗнче ӗҫленӗ, «Край» ташӑ театрне ертсе пынӑ. 2022 ҫулхи ҫурлп уйӑхӗнченпе вӑл Чӑваш патшалӑх юрӑпа ташӑ ансамблӗн балетмейстерӗн тивӗҫне пурнӑҫланӑ.
Паянтан Шупашкар муниципаллӑ округӗн администрацине Владимир Михайлов ертсе пырать. Вӑл унччен Тӑвай муниципаллӑ округӗн пуҫлӑхӗ пулнӑ.
36 ҫулти Владимир Михайлов кӑҫал авӑн уйӑхӗн варринчен Тӑвай округӗнчен должноҫрен кайнӑ. Вӑл ку муниципалитета 2020 ҫултанпа ертсе пынӑ. Унтан кайсан Шупашкар округӗн администрацийӗн пуҫлӑхӗн тивӗҫӗсене вӑхӑтлӑха пурнӑҫланӑ.
Чӑваш Енӗн вӗренӳ тата ҫамрӑксен политикин министрӗн пӗремӗш ҫумне Алексей Лукшина ӗҫрен кӑларнӑ. Ҫавӑн ҫинчен калакан хушӑва республика ертӳҫи Олег Николаев паян алӑ пуснӑ, документа влаҫ органӗсен официаллӑ порталӗнче вырнаҫтарнӑ.
Вӗренӳ министрӗн Дмитрий Захаровӑн паянхи кун икӗ заместитель тӑрса юлнӑ. Вӗсем – Надежда Никандрова тата Марина Лежнина.
Алексей Лукшин министерствӑри ҫав пукана шӑп та лӑп виҫӗ ҫул йышӑннӑ. Министр ҫумӗн тилхепине ӑна 2020 ҫулхи юпа уйӑхӗн 22-мӗшӗнче тыттарнӑ. Унччен вӑл Шупашкарти 45-мӗш шкул директорӗнче ӗҫленӗ.
Чӑваш Енри организаци-предприятисенче ҫынсем ӗҫе кайсан сусӑрланаҫҫӗ тата вилеҫҫӗ. Ӗҫри инкексене тата вӗсен сӑлтавне паян республика Правительствин ҫуртӗнчи канашлура сӳтсе явнӑ.
Кӑрлач-юпа уйӑхӗсенче производствӑра 17 ҫын йывӑр суранланнӑ, 8 ҫын вилмеллех аманнӑ.
Республикӑн ӗҫ тата социаллӑ хӳтлӗх министрӗ Алёна Елизарова палӑртнӑ тӑрӑх, инкексен иккӗ-виҫҫӗмӗш пайӗ ӗҫ хӑрушсӑрлӑхӗ енӗпе ҫителӗклӗ ӗҫлесе ҫитерейменрен пулнӑ. «Кун пекки, шел пулин те, нумай сферӑра сисӗнет», – тенӗ министр.
Ларура инкексем пулнӑ предприятисен представителӗсене итленӗ. Вӗсен шутӗнче — «Шупашкар алӑкӗсем», «Панулми», «Честрой ЖБК» обществӑсем, «Труд» ял хуҫалӑх предприятийӗ, «Чӑвашэнерго» филиалӗ.
Ҫӗнӗ Шупашкар тата Шупашкар хулисенче пӗрер пуҫлӑх юлӗ.
Хӑй вӑхӑтӗнче ҫавӑн пек пулнӑччӗ-ха. Анчах вырӑнти хӑй тытӑмлӑх ҫинчен калакан саккуна улшӑну кӗртнӗ хыҫҫӑн администраци пуҫлӑхӗсем (вӗсене тепӗр майлӑ сити-менеджер та теме тытӑнчӗҫ) пулса тӑчӗҫ тата Депутатсен пухӑвӗсен председателӗсене муниципалитетсен пуҫлӑхӗсем тесе тире урлӑ ҫырма тытӑнчӗҫ.
Шупашкарпа Ҫӗнӗ Шупашкарта малашне пӗр пуҫлӑхлӑ меслет ҫине куҫӗҫ.
Ӗнер Тӑвай муниципаллӑ округӗн депутачӗсем уҫӑ сасӑлав ирттерсе администраци пуҫлӑхне суйланӑ. Ҫак должноҫе администраци пуҫлӑхӗн ҫумӗ пулнӑ Олег Ломоносов йышӑннӑ.
Олег Анатольевич 45 ҫулта. Вӑл Тӑвайрах ҫуралса ӳснӗ, И.Н.Ульянов ячӗллӗ ЧПУра «истори» специальноҫпе вӗреннӗ. Кайран Атӑл-Вятка академи патшалӑх службинче пӗлӳ илнӗ.
Унӑн ӗҫ стажӗ – 23 ҫул, вӗсенчен 20-шне вырӑнти хӑйтытӑмлӑх органӗсенче вӑй хунӑ.
Чӑваш Енри общество палатин ертӳҫин пуканӗ пушӑ. Ун валли ҫын шыраҫҫӗ. Ҫавна май конкурс ирттереҫҫӗ.
Унччен ку должноҫре 32 ҫулти Артем Йовенко ӗҫленӗ. Вӑл ҫурла уйӑхӗн 1-мӗшӗнче ӗҫрен кайнӑ.
Конкурс условийӗсемпе килӗшӳллӗн, ҫак должноҫе йышӑнма хатӗр ҫыннӑн аслӑ пӗлӳ, ертӳҫӗре 3 ҫултан кая мар ӗҫлени, 5 ҫултан кая мар стаж пулмалла. Документсене чӳк уйӑхӗн 7-мӗшӗччен йышӑнаҫҫӗ.
Чӑваш Енӗн Патшалӑх ветеринари службин пуҫлӑхӗн ҫумне ӗҫрен кӑларнӑ. Ҫавӑн ҫинчен калакан йышӑнӑва ӗнер, юпа уйӑхӗн 18-мӗшӗнче алӑ пуснӑ.
Асӑннӑ должноҫра Николай Харитонов тӑрӑшнӑ. Асӑннӑ пукана вӑл 2014 ҫулта йышӑннӑ.
Чӑваш Енӗн Патшалӑх ветеринари службин пуҫлӑхӗн Александр Шакинӑн паянхи кну тӗлне пӗр заместитель тӑрса юлнӑ. Вӑл ҫын – Дмитрий Моисеев.
-0.7 °C